airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Inuuniarnermikkut atugarliortunut juullilernerani sammisassaqartitsinissanut tapiissutit

Ukiut siulii assigalugit ilaqutariinnut inuuniarnermikkut atugarliortunut juullilernerani sammisassaqartitsinissanut Isumaginninnermut Aqutsisoqarfimmut tapiissutinik qinnuteqarnissamut periarfissanngoqqippoq.
Kommunit tamarmik qinnuteqarnikuupput juullilerneranilu sammisassaqartitsinissanut ataatsimoortitsinissamut aammalu ulluinnarmit tatineqarfiusumit nuannaartitsinissamut periarfissinneqarlutik tapiissutisinikuullutik.

Qinnuteqartut 41-it tapiissutisipput aammalu katillugit 532.820 kr.-nit agguaanneqarput.
Juullilerneranut sammisassaqartitsinissat nuna tamakkerlugu nunaqarfinnut illoqarfinnullu agguataarneqarnikuupput.
Tapiissutit juullikkunni aaqqissuussinissanut assiginngitsorpassuarnut atorneqassapput, assersuutigalugu juullikkunni nereqatigiinnissanut, qiortaatitsinissanut imaluunniit juullerpaluttunik kaageeraliortitsinissanut.

Juullilernerani sammisassaqartitsinissat assigiissutaat tassaavoq, inuiaqatigiinni inuuniarnermikkut atugarliortunut tamarmik tunngatinneqarmata ilaatigullu ilaqutariit aningaasaqarnikkut allatigullu ulluinnarni unammilligassaqartut tapersersornissaat.

Nunatsinni sumiiffinni assigiinngitsuni sammisassaqartitsilluartoqarnissaa atuarlugu qiimmaallannartuaannarpoq. Pingaartumik ukioq manna takusinnaasimavarput, amerlasuut coronamut tunngatillugu maleruagassat iluanni inuuniarnermikkut atugarliortunut juullilernerani sammisassaqartitsinissamut neqerooruteqarsinnaaniarlutik isumassarsiorluarsimasut, assersuutigalugu sammisassaqartitsinissat ullunut arlalinnut ingerlanneqartussanngortinneqarsimallutik. Neriuppunga peqataasussat tamarmik qanigisatillu nuannersumik misigisaqaqatigiissasut kingumut qiviarlutik oqaluuserisinnaasaminnik” taama Aqutsisoqarfimmi pisortaq Helene Broberg Berthelsen oqarpoq.

Assiliaq 2019-imi Narsami juullilernerani aaqqissuussaminngaanneerpoq, ilaqutariit 40-t missaanniittut katersortarfimmut isaannginneranni, tassani nissimaaqarpoq juullerpaluttunillu oqaluttuanik atuaasoqarluni. Angajoqqaanut kaffeqarlunilu teeqarpoq meeqqanullu juullerpalaartunik mamakujoqarluni.

Juullerpalaartitsinissamut tapiissutinik agguaassineq pillugu paasisaqarnerorusukkaanni, taava Allattoqarfimmi pisortaq Sheila Flyckt Steen e-mailikkut shft@nanoq.gl-ikkut attavigineqarsinnaavoq.