airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Inersimasut kinguaassiutitigut meeraanerminni atornerlugaanikut

Nalinginnaasut

Meeraanermi kinguaassiuutitigut innarligaasimanerup inersimasunngornermi suut kingunerluutitarisarpai?
Tarnikkut, inuttut atukkatigut timikkullu anniaatit/ajornartorsiutit meeraanermi kinguaassiuutitigut innarligaasimanermik patsiseqartut inersimasunngornermi kingunerluutaasarput.

Makku arlaannik misigisaqaruit:
· Nikallunganeq
· Annilaanganeq
· Sinnattupiluttarneq utersaartitsisarnerlu
· Imigassamik/ikiaroornartumik atornerluineq
· Imminut toqunnissamik eqqarsarneq
· Suliffeqarniarnikkut ajornartorsiuteqarneq
· Aappariinnermi ajornartorsiuteqarneq/inoqatinut attaveqarniarnermi ajornartorsiuteqarneq
· Anigoruminaatsumik nalaataqarnikkut kingunerluuteqalerneq (PTSD)
· Nerinermut atatillugu eqqarsaatit akornuteqarnerat

Taamaattut inersimalernermi kingunerluutinit ajoquserneqarnerup ersiutigisinnaavai. Piffissaq sivisooq – ukiut arlaliugajuttut – qaangiukkaangata, inuttaa kinguaassiuutitigut innarligaanerminut atatillugu ikiorserneqarsimanngippat, takkukkajupput.

Kinguaassiuutitigut innarligaaneq pillugu eqqaamasat peerneqarsinnaanngillat, meeranermi pisut inuunerup ilassaatut ilikkarneqarsinnaapput, inersimasutullu pitsaasumik inuuneqarnissap inuunerullu naleqassusaata pitsaanerulersinnissaanut ikiorsiisoqarsinnaalluni.


Angalaqatigiinnit ikiorneqarsinnaavunga?
Meeraaninni kinguaassiuutitigut innarligaasimaneq kingunerluuteqartippiuk? Ingerlariaqqinnissannut ikiorneqarusuppit? Taava immaqa ”inersimasunik meeraanermi kinguaassiuutitigut innarligaasimanikkut kingunerlutitsisunut katsorsaasunit angalaqatigiinnit” katsorsartinnissamut qinnuteqarnissaq ilinnut periarfissaassaaq.
Inersimasut kingunerlutitsisut inuunerinnerulernissaannut angalaqatigiit ikiuuttarput. Angalaqatigiit suleqatigiinnik assigiinngitsunik, tarnip pissusaanik immikkut ilisimasalinnik tarnikkullu katsorsaasunik, nuna tamakkerlugu neqeroorlutik, inersimasunut meeraanerminni kinguaassiuutitigut innarligaasimasunik katsorsaasunik inuttaqarpoq. 2013-imi angalaqatigiit pilersinneqarmatali inuit 650-it sinneqartut illoqarfinni 13-ini nunaqarfiniillu marlunni katsorsartipput.

Katsorsaasut angalaqatigiit qaammatini aqqanilinni, qaammatit tamaasa sap.ak. naallugu illoqarfimmiittarput nunaqarfimmiittarlutilluunniit. Tassani eqimattanut ilaallutit kisimiillutilluunniit katsorsartissinnaavutit. Katsorsaasunut angalaqatigiinnut peqataaniarnerit nalunaarutigigukku, innersuussinissaq siunertaralugu katsorsaasunik oqaloqateqarnissannut aggersarneqassaatit. Angalaqatigiit tamatumani katsorsartinnissamik pisariaqartitsinerit – ass. eqimattanut ilaallutit kisimiillutilluunniit katsorsartinnissamik neqeroorfigineqarnissat naliliivigissavaat. Tamatuma kingorna katsorsartinnissap immikkoortuanut siullermut qaaqquneqassaatit. Nalinginnaasumik angalaqatigiit katsorsaajartorlutik illoqarfimmut/nunaqarfimmut angalaneranni katsorsartinnissamut immikkoortunik marlunnik neqeroorfigineqassaatit.
Akeqarpa?
Kinguaassiuutitigut innarligaasimanerup kingorna kingunerluutit pillugit angalaqatigiinnit katsorsartinneq akeqanngilaq.
Qanoq iliussaanga?
Illit illoqarfinni/nunaqarfinni kingunerluutinut katsorsartinnissamut sunik neqerooruteqarsinnaanera paasiniarlugu najukkanni kommunip allaffia, isumaginnittoqarfik ilaqutariinnilluunniit sullissivik attavigiuk.
Angalaqatigiit illoqarfimmiippata, angalaqatigiit najukkami suleqataannut angalaqatigiinnut attaveqartitsisussamut innersuunneqassaatit. Illoqarfiit ornitat najukkanilu attavissat pillugit angalaqatigiit Facebookkikkut qupperneranni paasissutissanik illit nammineq aamma pissarsisinnaavutit: https://www.facebook.com/Angalaqatigiittartut-Rejseholdet-1098082976975941/
Peqataaniarluni nalunaarfissat
Angalaqatigiit illoqarfinnut/nunaqarfinnut tikippata katsorsartissinnaavutit, ataavartumik katsorsartittussanik tigooraasoqartarpoq. Nuummi sukkulluunniit angalaqatigiinnit katsorsartittoqarsinnaavoq.
G-LHFDRCYS34