airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Meeqqat kinguaassiutitigut atornerlugaasimasut

Nalinginnaasumik

Illit meeqqat kinguaassiuutitigut innarligaasimava? Ingerlariaqqinnissaanut eqqortumik katsorsartinnissamut periarfissikkusuppiuk? Illit qanigisaasutut aamma oqaloqateqarnikkut ikorfartorneqarnissaq pisariaqartippiuk?

Meeqqanut tunngatillugu, meeqqanik katsorsaasut angalaqatigiit meeqqanik inuusuttunillu kinguaassiuutitigut innarligaasimasunik katsorsaaneq neqeroorutigaat.
Meeqqanik katsorsaasut angalaqatigiit, meeqqat ataasiakkaat immikkut katsorsarneqarnissaat meeqqallu/inuusuttullu tungiuisuisa ilaatinnissaat neqeroorutigaat. Meeqqanik katsorsaasut angalaqatigiit tunngaviusumik ukiut marluk missaanni sap. ak. ataasiarlutik illoqarfimmiinneranni meeraq qitiutiitigalugu meeqqap attavigisartagai qaninnerpaat ukkanneqartarput.

Meeqqanik katsorsaasut angalaqatigiit angalanermi ataatsimi sap.ak. ataatsip missaani illoqarfimmiinneranni, meeqqat inuusuttullu kinguaassiuutitigut innarligaasimasut, angalanermi ataatsimi ataasiarlutik marloriarlutilluunniit katsorsartinnissamik neqeroorfigineqartarput. Illoqarfinni nunaqarfinnilu tamani meeqqanik katsorsaasut angalaqatigiit suliaat pillugit ilisimasassanik siammarsaanermi ikiuuttunik suleqateqartoqarpoq.


Meeqqat inuusuttullu kinguaassiuutitigut innarligaasimanerannut ersiutit

Meeqqat assigiinngillat. Assigiinngitsumik qisuariartarput, ukiui inerisimassusaallu apeqqutaallutik assigiinngitsumik malunnaateqartarlutik. Taamaammat meeqqat inuusuttullu kinguaassiuutitigut innarligaasut qanoq qisuariaateqartarnerannut nalunaarsuiffeqanngilaq. Ataanili ersiutit qisuariaatillu ilaat kinguaassiuutitigut innarligaanermi takuneqarsinnaasarput:

- Peqqusaartutut pissuseqarneq
- Pissutsip allannguuteqarnera
- Inummut aalajangersimasumut akeqqersimaarneq
- Tassanngaannaq qialersarneq (annilaanganeq)
- Sinissaaleqineq (sinnattupilunneq)
- Timikkut ersiutit
- Nikallunganeq
- Kamajaneq (uniffeqannginneq)
- Ukkassisinnaalluannginneq
- Imminut ajoquserniarneq
- Utersaarneq (meeqqap inuusuttulluunniit siusinnerusukkut tarnikkut ineriartornermut utersaarnera)
- Piumassuserinngiamik qarlinnut anarneq imal. quineq (eqqiluisaarnissamut tunngatillugu ajornartorsiuteqarneq)
- Naleqanngitsutut misigineq (ikiorfeqannginneq, sorusussuseqannginneq)
- Nerinermut atatillugu eqqarsaatit akornuteqarnerat
- Nasserineq, niaqorlunneq
- Nipaarluuneq
- Eqqumiiginartumik eqqiluisaarneq
- Kannguttannginneq imal. ingasattajaartumik kannguttarneq
- Eqqarsaatit iliuutsillu ingalassimajuminaatsut 

Ersiutit taakku kinguaassiuutitigut innarlerneqarsimanermut takussutissaasinnaapput. Meeqqap pissusaa tassanngaannaq allanngorpat imal. ersiutit ernumanaatillit arlallit takkuppata qisuariassaatit. Ersiutit tamatigut kinguaassiuutitigut innarligaanermut uppernarsaataanngillat. Ersiutilli tamatigut pisumut iiliuuseqarnissamullu tunngatillugu periarfissannik isumaliutiginnilersitsisariaqarput.
Meeqqanik katsorsaasut angalaqatigiit meeqqanik inuusuttunillu kinguaassiuutitigiut innarligaasimasunik katsorsaasarput.


Akeqarpa?
Kinguaassiuutitigut innarligaanerup kingorna meeqqanik katsorsaasunit angalaqatigiinnit katsorsartinneq akeqanngilaq.
Qanoq iliussaanga?

Meeqqamik inuunerissusaa navianartorsiortinneqartumik - kinguaassiuutitigut innarlerneqarsimasinnaasumik nalunngisaqaruit pasitsaassiguilluunniit, siullermik isumaginnittoqarfik qaninneq attavigissavat kommunilu nalunaarfigalugu. Isumaginnittoqarfiup ilisimasannik nalunaarfigineragut meeraq ikiussavat. 

Tamanna ulluinnarni meeqqanik inuusuttunillu sullissisuuguit taamaammallu sakkortusisamik nalunaartussaatitaallutit pingaarnertut atuuppoq.
Kommunimit innersuussut ilaqutariinnik sullissivinnut katsorsaanerit ingerlanneqarfigisinnaasaannut ingerlateqqinneqassaaq. Annertunerusumik pisariaqartitsisoqarpat, kommuni meeqqanik katsorsaasunut angalaqatigiinnut imal. Isumaginninnermut Aqutsisoqarfimmut attaveqassaaq, tamatumalu kingorna qaqugu meeqqanik katsorsaasut angalaqatigiit illit illoqarfinnukarsinnaanissaa/nuunaqarfinnukarsinnaanissaa paasiniarneqassaaq. 

(NALUNAARTUTISAANEQ PILLUGU ALLAASERISAMUT ATTAVIK)