airplanebooksbriefcase business cogs cross election entertainment fish house law lockmedicalpeopleselfservices socialtax
[Log ind]

Meeqqat inuusuttullu nakuusernermik nalaataqartut

Paasissutissat nalinginnaasut
Suliamik ilisimasalittut suliaqartutullu meeqqanik inuusuttunillu nakuusernermik nalaataqartunut naapitsisassaatit. Meeqqat inuusuttullu nakuusernermik nalaataqarsimasut ersiutai pillugit maani ilitsersuut pissarsiarisinnaavat. Tassanilu meeqqat inuusuttullu nakuusernermik nalaataqarsimasut pillugit nalunaarnissamut ikiuinissamullu ilitsersuut aamma pissarsiarisinnaavat.
Meeqqat inuusuttullu nakuusernermik nalaataqarsimasut ersiutai

Meeqqanut inuusuttunullu nakuuserneq assigiinngisitaartorujussuusinnaavoq, nakuuserluni iliuuserisartakkat amerlaqimmata. Tassaasinnaapput timikkut persuttagaaneq, tarnikkut ikiligaaneq imaluunniit kinguaassiutitigut atornerlunneqarneq.

Angerlarsimaffimmi meeqqap nakuusertoqarneq misigisimappagu, nakuuserfigineqartoq assigalugu meeqqamut ajoqutaatigivoq. Nakuusernerit assigiinngitsut tamarmik meeqqanut inuusuttunullu ajortumik kinguneqartarput. Taamaattumik suliamik ingerlataqartutut meeraq nakuusernermik nalaataqarsimasoq pasitsaakkukku iliuuseqarnissat pingaaruteqarpoq.
Ersiutit ilisarnaatillu sorliit eqqumaffigissavigit?

Meeqqap iliuuserisartakkani tassanngaannaq allanngortippagit imaluunniit aarlerinartunik atugaqartoq pasitsaakkukku, taava qisuariartariaqarputit.
Meeraq nakuusernermik nalaataqarsimasoq imaluunniit angerlarsimaffimmi nakuusertoqarfiusumi peroriartortoq paasigukku nalunaarnissamut pisussaaffeqarputit.

Aarleqqutaasinnaasutut ersiutit:

• Timimi ersiutit, assersuutigalugu tilluusat
• Kamanneq aamma pissutissaqanngitsumik kamarujussuartarnerit
• Peqqarniitsumik iliuuseqartarneq imaluunniit aaqqiagiinnginnermi aaqqikkuminaatsitsineq
• Napparsimanerarluni peqanngippallaarnerit
• Angerlarnissamut annilaangasarneq imaluunniit angerlarsimaffimmiit qimaasarneq
• Matoqqasuuneq aamma pasinnikkajunneq
• Qimaaqqajaaneq inersimasunullu naalakkumannginneq
• Ikinngutinut pinnguaqatigisartakkanullu qaaginnarsiorpasilluni pissusilersorneq
• Timikkut ajoqutit, soorlu naarlunneq, niaqorlunneq
• Aarlereqqajaaneq annilaangaqqajaasutullu pissusilersorneq

Meeqqat inuusuttullu nakuusernermik nalaataqarsimanertik kanngusuutigigajuttarpaat, toqqorterniartarlugulu. Allalli allaanngillat sunnertissimanatillu ersiuteqanngitsut. Ersiutit nakuusertoqarneranik uppernarsaataanngillat. Kisiannili ersiutit tamatigut, inissisimaffik qanorlu iliussanerlutit periarfissatit isumaliutigisariaqarpatit.
Meeqqat inuusuttullu nakuusernermik nalaataqartut inersimasunit tusarnaarneqarnissaminnik pisariaqartitsisarput, nakuusernerullu unitsinnissaa isumagalugu.

Nakuusernerup meeqqanut inuusuttunullu kinguneri

Ulluinnarni nakuuserneq inooqataaffigigaanni tamanna meeqqat ineriartornerannut sunniuteqartarpoq – piffissaq sivikinnerusoq sivisunerusorlu eqqarsaatigalugit. Meeraanermi nakuusernermik nalaataqartarneq makku ilaatigut sunniutaasinnaapput:

• Toqqissisimannginneq annilaanganerlu
• Imminut annikitsuaraannarmik naleqartinneq
• Kamassarnerit aamma pissusilersornikkut ajornartorsiuteqarneq
• Nerrerlunneq aamma atornerluineq
• Imminut toqoriarneq aamma tarnikkut ajuuteqarneq


Nalunaartussaatitaaneq

Suliamik ilisimasalittut isumaginnittoqarfimmi, atuarfeqarfimmi peqqinnissaqarfimmiluunniit sulisuuguit isumaginninnermik oqartussat nalunaarfiginissaannut annertusisamik pisussaaffeqarputit. Meeraq atugarliortoq immaqalu nakuusernermik allatigulluunniit sumiginnaanermik nalaataqartoq pasitsaakkukku nalunaartussaatitaavutit.

Nakuusernerup ingerlaannaq unitsinnissaa pileqqinnginnissaalu meeqqamut pingaarnersaavoq. Meeqqat inuusutullu nakuusernermik nalaataqarsimanerat pasitsaakkukku piaarnerpaamik akulerunnissat pingaaruteqarpoq.

Qanoq nalunaassaanga 
Nalunaarnerup qanoq pinissaa pillugu piumasaqaateqartoqanngilaq. Pisoq apeqqutaatillugu nalunaarneq allakkatigut, oqarasuaatikkut, nammineerluni saaffiginninnikkut imaluunniit mailikkut pisinnaavoq. Nalunaarneq pillugu kommune iliuuseqassaaq, qanoq nalunaarsimanerit apeqqutaatinnagu. Nalunaarnerit amerlanertigut allakkatigoortariaqarput, allakkat uppernarsaatitut atorsinnaammata. Ilumoortunik aalajangersimasunillu tigussaasunillu naammattoorsimasanik sapinngisaq malillugu nalunaarneq tunngavilersorneqassaaq (suna takuiuk, tusaaviuk il.il.).

Ulluunerani paaqqinnittarfinnit, atuarfinnit aamma meeqqanik paarsisartunit nalunaarneq pisortamit ileqquusutut atsiorteriarlugu, taanna isumaginninnermik ingerlatsivimmut nassiunneqassaaq. Nalunaarnerup piareersarnissaanut nassiunnissaanullu aajuna siunnersuut:

• Suut takuigit misigaagillu? Meeraq nakuusernermik nalaataqarsimasoq imalt. angerlarsimaffimmi nakuusernermik nalaataqarsimasoq pasitsaakkukku, sooq taamatut pasitsaassaqarnerit allaguk             tunngavilersuutitalerlugulu.
• Tamanna pisortallu oqaloqatigiissutigisiuk, nalunaarullu kommunimut pisortannit nassiutsillugu.
• Nalunaartussaatitaaneq sulisunut ataasiakkaanut atuuppoq. Ima paasillugu; nalunaarnissamut pisortarisat tamatigut isumaqatigisariaqanngilat.
• Angajoqqaat ilanngunneqassanersut isumaliutersuutigiuk. Eqqaamallugu: Angajoqqaat nakuusertartutut pasitsaassimagukkit angajoqqaat ilanngussanngilatit, tamannami meeqqamut ajoqusiinermik       kinguneqarsinnaammat!
• Nalunaarneq kingusinnerpaamik nassiunneqarnerminiit sapaatip akunnerata qaangiunnerani kommunimit tiguneqartutut uppernarsarneqassaaq. Uppernarsaat nalunaarnermik nassiussisumut                qaatiguulerneqarluni nassiunneqassaaq.
• Kommune illiuuseqanngitsoq paasigukku nalunaarfigissavat: Isumaginninnermi Naammagittaalliuuteqartarfik 

Qularutit pillugit suleqatitit oqaloqatigikkit
Nakuusernermik pasisaqartoqarnerani iliuuseqarnissaq ajornakusoortorujussuusinnaavoq, iliuuseqarnissallu qularileriataarsinnaavat. Pasitsaassaqalersimanermi piareersimanissaq iluaqutaasinnaasorujussuuvoq. Suleqatit peqatigalugit pineqartoq oqaloqatigiissutigisimagaanni, qanorlu iliornissamut eqqarsaqatigiillusi, taava iliuuseqarnissaq eqqortumillu iliornissaq ilimanarnerulissaaq.
Suliffissinni allatanik ilitsersuuteqarneq iluaqutaasinnaavoq, tassanimi allaqassaaq meeraq nakuusernermik nalaataqarsimasoq pasitsaanneqarpat qanoq iliortoqassanersoq. Suliamik ilisimasalittut nalorniunnaarnissamut tamanna ilapittuutaasinnaavoq. Suliamik suliaqartutut inuttullu aarleqquteqarnerup avitseqatigiiffigineqarsinnaanera pisariaqartinneqarsinnaavoq, taamaattumillu paasisariaqartoq unaavoq; kina saaffigissavara, saaffiginnikkumalu qanoq pisoqassava?
Imminut upperissallutit aamma suliatigut ilisimasaqarnerit upperissallugu pingaaruteqarpoq. Takunikuusat takunikuuat. Pisortat qaninnerpaaq peqatigalugu eqqarsaatitit naammattuukkatillu oqaloqatigiissutigisigit. Oqaloqatigiinnikkut qularutit ajugaaffigiuminarnerusarput.


Inatsit