Inersimasut meeraanerminni kinguaassiutitigut atornerlugaanikut

Meeraanermi kinguaassiuutitigut innarligaasimanerup inersimasunngornermi suut kingunerluutitarisarpai?
Tarnikkut, inuttut atukkatigut timikkullu anniaatit/ajornartorsiutit, meeraanermi kinguaassiuutitigut innarligaasimanermik patsiseqartut, inersimasunngornermi kingunerluutaasarput.

Kinguaassiuutitigut innarligaasimaneq ilaatigut makkunannga kingunerluuteqartarpoq:

• Nikallunganeq
• Annilaanganeq
• Imigassamik /ikiaroornartumik atornerluineq
• Imminut toqunnissamik eqqarsarneq
• Suliffeqarniarnikkut ajornartorsiuteqarneq
• Aappariinnermi ajornartorsiuteqarneq/inoqatinut attaveqarniarnermi ajornartorsiuteqarneq
• Anigoruminaatsumik nalaataqarnikkut kingunerluuteqalerneq (PTSD)
• Nerinermut atatillugu eqqarsaatit akornuteqarnerat

Inersimalernermi kingunerluutit piffissaq sivisooq – ukiut arlaliugajuttut – qaangiukkaangata, inuttaa kinguaassiuutitigut innarligaanerminut atatillugu ikiorserneqarsimanngippat, takkukkajupput.
Inersimasunngornermi kingunerluutit, ilaatigut inuit ataasiakkaat ulluinnarni inuunerminnut iliuuseqarfiginnissinnaanerannut ajortumik sunniuteqarsinnaapput. Qanimut attavigissanik naligiimmik ineriartortitsineq, suliffimmik attasiinnarsinnaaneq meeqqallu peroriartornerminni pitsaasunik atugassaqartinnissaat ajornakusoorsinnaapput.

Kinguaassiuutitigut innarligaaneq pillugu eqqaamasat peerneqarsinnaanngillat, meeranermi pisut inuunerup ilassaatut ilikkarneqarsinnaapput, inersimasutullu pitsaasumik inuuneqarnissap inuunerullu naleqassusaata pitsaanerulersinnissaanut ikiorsiisoqarsinnaalluni. ”inersimasunut meeraanermi kinguaassiuutitigut innarligaasimasunut kingunerluuteqartitsisunut katsorsaasut angalaqatigiit” innuttaasut kingunerlutitsisut inuunerinnerulernissamut ikiorneqarnissaat siunertaralugu, Naalakkersuisunit 2013-imi pilersinneqarput.

Angalaqatigiit suleqatigiinnik assigiinngitsunik, tarnip pissusaanik immikkut ilisimasalinnik tarnikkullu katsorsaasunik, nuna tamakkerlugu neqeroorlutik inersimasunut meeraanerminni kinguaassiuutitigut innarligaasimasunik katsorsaasunik inuttaqarpoq. 2013-imi angalaqatigiit pilersinneqarmatali inuit 650-it sinneqartut illoqarfinni 13-ini nunaqarfiniillu marlunni katsorsartipput.

Katsorsaasut angalaqatigiit qaammatini aqqanilinni, qaammatit tamaasa sap.ak. naallugu illoqarfimmiittarput nunaqarfimmiittarlutilluunniit. Tassani eqimattanut ilaallutit kisimiillutilluunniit katsorsartissinnaavutit. Katsorsaasunut angalaqatigiinnut peqataaniarnerit nalunaarutigigukku, innersuussinissaq siunertaralugu katsorsaasunik oqaloqateqarnissannut aggersarneqassaatit. Angalaqatigiit tamatumani katsorsartinnissamik pisariaqartitsinerit – ass. eqimattanut ilaallutit kisimiillutilluunniit katsorsartinnissamik neqeroorfigineqarnissat naliliivigissavaat. Tamatuma kingorna katsorsartinnissap immikkoortuanut siullermut qaaqquneqassaatit. Nalinginnaasumik angalaqatigiit katsorsaajartorlutik illoqarfimmut/nunaqarfimmut angalaneranni katsorsartinnissamut immikkoortunik marlunnik neqeroorfigineqassaatit.
Katsorsaanerup saniatigut, najukkani ilinniagallit kinguaassiuutitigut innarligaanermut tunngatillugu sulianik ingerlatsisut piginnaasaannik qaffassaanerit assigiinngitsut angalaqatigiinnit neqeroorutaapput. Ass. tarnimikkut nappaatilinnik nappaat pillugu ilinniartitsinertut, attaveqarfigisanik ataatsimeeqateqarnertut, ikorfartuinertut/supervision pikkorissaanertullu piginnaasanik qaffassaasoqartarpoq.

Kinguaassiuutitigut innarligaasimanerup kingorna kingunerluutit pillugit angalaqatigiinnit katsorsartinneq akeqanngilaq.

Illit illoqarfinni/nunaqarfinni kingunerluutinut katsorsartinnissamut sunik neqerooruteqarsinnaanera paasiniarlugu najukkanni kommunip allaffia, isumaginnittoqarfik ilaqutariinnilluunniit sullissivik attavigiuk.
Angalaqatigiit illoqarfimmiippata, angalaqatigiit najukkami suleqataannut angalaqatigiinnut attaveqartitsisussamut innersuunneqassaatit. Illoqarfiit ornitat najukkanilu attavissat pillugit angalaqatigiit Facebookkikkut qupperneranni paasissutissanik illit nammineq aamma pissarsisinnaavutit: https://www.facebook.com/Angalaqatigiittartut-Rejseholdet-1098082976975941/

Angalaqatigiit illoqarfinnut/nunaqarfinnut tikippata katsorsartissinnaavutit, ataavartumik katsorsartittussanik tigooraasoqartarpoq. Nuummi sukkulluunniit angalaqatigiinnit katsorsartittoqarsinnaavoq.