airplanebooksbriefcase business cogs cross election entertainment fish house law lockmedicalpeopleselfservices socialtax
[Log ind]

Killiliisa

Kinguaassiutitigut atornerluineq akiorniarlugu Naalakkersuisunit periusissaq 2018-2022
Paasissutissat nalinginnaasut
Killiliisamit anguniakkat – Kinguaassiutitigut atornerluineq akiorniarlugu Naalakkersuisunit periusissaq 2018-2022 - tassaapput allannguinernik iluaqutaasunik pilersitsinissaq kiisalu kinguaassiutitigut atornerluinerit ikilisinnissaat. Periusissaq nutaaq atorlugu,siunissaq isigalugu kinguaassiutitigut atornerluinerit pitsaaliornissaannut, kiisalu kikkunnulluunniit pisariaqartitsisunut pitsaanerusumik ikiuunnissamut tapersersuinissamullu suliniutinik Naalakkersuisut aallarniiniarput. Meeraanermi kinguaassiutitigut atornerlunneqarsimagaluartunulluunniit - inersimasuugaanni, qanigisaasuugaanni suliamilluunniit ingerlataqaraluarluni – sapinngisaq malillugu pitsaanerpaamik ikiorsiisoqartassaaq.

Suliamik ilisimasaqarfiit assigiinngitsut akornanni tapertariilluni suleqatigiinneq periusissami tunngaviuvoq, tassanilu periusissami suliniutit pissusiviusut tunngavigalugit piukkunnarsarnissaannut piviusunngortinnissaannullu malitseqartitsisussat siamaseqisumik katiterneqarnikuupput. Malitseqartitsisussat tassaapput isumaginninnermik suliassaqarfimmit, peqqinnissaqarfimmit, ilinniartitaanermik suliaqarfimmit, kommuninit tallimaasunit, Pinerluttunik Isumaginnittunik, Politiinit, eqqartuussisoqarfimmit, MIO-mit aamma Nunamut tamarmut qitiusumik Ilitsersuisarfimmit sinniisut.

Periusissami oqaatsit pingaarnertut atorneqartut:
- Killiliineq
- Tapertariilluni suleqatigiinneruneq
- Suliniutit ataatsimut isiginnittut
- Najukkami suliniutit
Killiliisa iluaqusiullugu kinguaassiutitigut atornerluisarnerit qanoq annikillisarniarneqarpat?

Kalaallit Nunaanni innuttaasut pingajorarterutaat sinnerlugit kinguaassiutitigut atornerlunneqartarsimanerat misissuinernit assigiinngitsunit oqaatigineqarnikuuvoq. Taamaalilluni pineqartoq ajornartorsiutaavoq annertoorujussuaq, Killiliisamiillu anguniarneqartoq kinguaassiutigut atornerluisarnerup annikillisinneqarnissaa iluatsinneqassappat, suliniutit assigiinngitsorpassuit sivisuujusullu pisariaqarput.

Kinguaassiutitigut atornerluinerit ajornartorsiutitut immikkuullarissutut isigineqannginnissaat periusissami ersarissumik naqissuserneqarpoq. Inuit inunnik allanik kinguaassiutitigut atornerluisarnerannut pissutaasut assigiinngitsorpassuusinnaapput, ilisimatusarnikkullu paasineqarnikuuvoq kinguaassiutitigut atornerluisarnerit isumassuinerlunnernut atugarliornernullu assigiinngitsunut qanittumik attuumassuteqartartut. Ilaatigullu ersarilluinnartumik makku attuumassuteqartuusutut taaneqarsinnaapput:

- Meeraanermi angerlarsimaffimmi kinguaassiutitigut aamma imigassamik aangajaarniutinilluunniit atornerluineq.
- Kinguaassiutitigut atornerluineq aamma siusissumik annertuumik imigassartortalerneq.
- Kinguaassiutitigut atornerluineq aamma naartuersittarnerit naartumilluunniit katatsisarnerit.
- Kinguaassiutitigut atornerluineq aamma imminut toqunnerit/imminut toqoriarnerit.
- Kinguaassiutitigut atornerluineq aamma nakuuserneq.
- Kinguaassiutitigut atornerluineq aamma meeraanermi nammineq atornerluisimaneq.

Taamaattumik kinguaassiutitigut atornerluisarnerup pitsaaliorneqarnissaanut inooqataasunut innuttaasunullu tunngassuteqartuusutut eqqarsaataanissaa Naalakkersuisut isumannaarniarpaat, tamatumanilu suliaqartut assigiinngitsut piginnaasaqarfinnit assigiinngitsuneersut iliuuseqarnissaat pisariaqarpoq. Tamatuma saniatigut kinguaassiutitigut atornerluisarneq ajornartorsiutaanngilaq killiligaasoq, ima paasillugu Kalaallit Nunaanni najugaqarfinni tamani taamatut iluaqutaasumik iliuuserineqartut assingi aallartinneqarsinnaassasut. Nuna tamaat isigalugu inooqataanikkut, piorsarsimassutsikkut, ingerlasussanik piareersarnermi aqutsinermilu kiisalu inuiaqatigiinni aningaasaqarnikkut assigiinngissutit annertoqisut apeqqutaatinneqassapput, suliniutinullu assigiinngitsunut aallartinneqartunut attuumassuteqartutut eqqarsaatigineqassallutik. Taamaattumik pitsaanerpaamik angusaqarusulluni periusissami iliuusissat najukkani ataasiakkaani pissutsinut, periarfissanut pisariaqartitanullu naleqqussarneqassapput.

Periaaserineqartartunut iliuuseqarnissamik pisariaqartitsiffiusunut, immikkut unammilligassat tunngavigalugit sammisanik arfinilinnik imaqarput. Suliniuteqarfiup nalaani suliat iliuusissanut pilersaarutinik tigussaasunik imaqartut, anguniarneqartullu sammisani ataasiakkaani iliuuseqarfigineqassapput. Suliniuteqarnerup ingerlarngata iluani sammisanut tamanut suliassamut pilersaarusianik piviusunik angusassat toraagalinnik suliniutinik aallarnisaasoqartariaqarpoq.

Pingaarnertut sammisanut arfinilinnut anguniagassat:

- 1. Paasissutissiineq / Ilisimasanik avitseqatigiinneq:
Kinguaassiutinik atornerluisarneq pillugu innuttaasunut paasititsiniaanermik ingerlatsineq annertusarneqassaaq, anguniagaqarfiussalluni patajaallisarneqassallunilu.

- 2. Pitsaaliuineq:
Kinguaassiutinik atornerluisarneq pillugu pitsaaliuineq annertusineqarlunilu nukittorsarneqassaaq.

- 3. Tapertariilluni suleqatigiinneq
Kinguaassiutinik atornerluisarneq pillugu pitsaaliuinermut katsorsaanermullu tunngasunik tapertariilluni suleqatigiinneq patajaallisarneqassaaq.

- 4. Atornerlunneqartut qanigisaasullu:
Atornerlunneqartut ilaqutaasullu kinguaasiutitigut atornerluinermut atatillugu ikiorserneqarnissamik pisariaqartitsisut pitsaanerusumik tapersersorneqarnissamut, siunnersorneqarnissamut sullinneqarnissamullu neqeroorfigineqassapput.

- 5. Najukkami innuttaasut:
Periusissaq malillugu iliuutsit najukkani ataasiakkaani innutaasunut tunngatinneqassapput, kinguaassiutitigullu atornerluinermik akiuiniarnerup pitsaanerusumik sunniuteqarnissaa akuunerusutullu misiginissaq suleqataanerlu isumannaarniarlugit inooqataanikkut piorsarsimassutsikkullu assiginngissutsit apeqqutaatinneqassapput.

- 6. Inuit kinguaassiutitigut kannguttaatsuliortartutut pissusilersortut:
Inuit kinguaassiutitigut kannguttaatsuliortartutut pissusilersortut aamma kannguttaatsuliorsinnaasutut isigineqartut ikiorserneqarnissamik suliaritinnissamillu neqeroorfigineqassapput.


Periusissamut Linki

Uani Killiliisa aaguk   

Kalaallisut 

Qallunaatut