airplanebooksbriefcase business cogs cross election entertainment fish house law lockmedicalpeopleselfservices socialtax

Pitsaaliuinermut Isumaginninnermullu Aqutsisoqarfik pillugu

Pitsaaliuinermut Isumaginninnermullu Aqutsisoqarfik pillugu

Pitsaaliuinermut Isumaginninnermullu Aqutsisoqarfiup inunnik isumaginninnermi suliassaqarfiup iluani ingerlatsinikkut, siunnersuisarnikkut ineriartortitsinikkullu suliassat arlaqartut naammassisarnissaat pingaarnertut suliassarai. Suliassaq naammassiniarlugu Pitsaaliuinermut Isumaginninnermullu Aqutsisoqarfik immikkoortunut pingasunut aaqqissugaavoq, taakkulu tassaapput Ulloq unnuarlu paaqqinniffiit aamma Innersuussisarnermut immikkoortortaq, Qitiusumik Siunnersuisoqarfik aamma Pilersaarusiornermut Ineriartortitsinermullu Immikkoortortaq.

Aqutsisoqarfiup iluani suliassat suliarisinnaaniarlugit Pitsaaliuinermut Isumaginninnermullu Aqutsisoqarfimmut Allattoqarfik aamma Aningaasaqarnermut Immikkoortortaq ilaapput, taakkulu aqutsisoqarfiup iluani suliassat pingaarnertigut suliarisarpaat.

Pitsaaliuinermut Isumaginninnermullu Aqutsisoqarfiup suliassai Aningaasanut Inatsimmi aalajangersagaapput, suliassallu tullinnguuttuni taaneqartut immikkoortortani ataasiakkaani pingaarnertut annermik suliarisarlugit:

• Ulloq unnuarlu paaqqinniffiit ingerlanneqarnerat taakkununngalu innersuussisarnerit.
• Meeqqanut inuusuttunullu inunniarnermikkut atugarliortunut atatillugu kommuninik siunnersuisarneq ilitsersuisarnerlu.
• Meeqqanut inuusuttunullu suliassaqarfimmi inatsisitigut isumaginninnikkullu sulinermi ilisimasaqarnerulersitsiniarluni pikkorissartitsinerit.
• Inersimasunik meeraanerminni kinguaassiutitigut atornerlunneqarsimallutik kingunerlutitsisunik katsorsaallutik angalaqatigiittartut ingerlannerat aamma
• Isumaginninnermi suliassaqarfimmi ineriartortitsiffiusumik suliniutit
• Isumaginninnermi suliassaqarfimmi periutsinik ineriartortitsineq
• Katsorsaanermut neqeroorutinik ingerlatsineq, soorlu:

  • Inersimasunik meeraanerminni kinguaassiutitigut atornerlunneqarsimallutik kingunerlutitsisunik katsorsaallutik angalaqatigiittartut
  • Meeqqanik kinguaassiutitigut atornerlunneqarsimasunik katsorsaallutik angalaqatigiittartut
  • Inunnut persuttaasartunut katsorsartinnissamik neqeroorut, Alliaq

Kommunit aamma Pitsaaliuinermut Isumaginninnermullu Aqutsisoqarfiup akornanni oqaloqatigiinnerit misilittakkanillu avitseqatigiittarnerit patajaallisarniarlugit Ineriartortitsinermut Siunnersuisoqatigiit Pitsaaliuinermut Isumaginninnermullu Aqutsisoqarfimmi siunnersuisussatut pilersinneqarsimapput. Ineriartortitsinermut Siunnersuisoqatigiit ukuninnga aallartitanik inuttaqarpoq: Kommunit, Pitsaaliuinermut Isumaginninnermullu Aqutsisoqarfik, Isumaginninnermut Inatsisinillu Atuutsitsinermut Naalakkersuisoqarfik aamma inuit sulianik ilisimasallit.

Siunnersuisoqatigiit ataatsimiittarnerini kommunit aamma Pitsaaliuinermut Isumaginninnermullu Aqutsisoqarfik misilittakkanik avitseqatigiissinnaapput, Pitsaaliuinermut Isumaginninnermullu Aqutsisoqarfiup suliaanut tunngatillugu oqaloqatigiittuarnerit suleqatigiinnerillu pilersinneqarsinnaallutik.


Ulloq unnuarlu paaqqinniffiit aamma Innersuussisarnermut Immikkoortortaqarfik

Ulloq unnuarlu paaqqinniffiit Namminersorlutik Oqartussanit pigineqartut ingerlanneqarnerat pillugu suliaqarpoq aamma ulloq unnuarlu paaqqinniffinnut namminersortunit ingerlanneqartunut, kommuninit aamma Namminersorlutik Oqartussanit pigineqartunut innersuussisarnermik suliaqarluni. Immikkoortortap Qitiusumik Inissiinissamut Innersuussisarfik ingerlataraa, tassungalu atatillugu ulloq unnuarlu paaqqinniffinnut namminersortunit ingerlanneqartunut, Namminersorlutik Oqartussanit kommuniniillu pigineqartunut akuersissuteqartarnermut akisissaasuulluni. Tamatuma saniatigut immikkoortortap Pissassarfik - Inunnut innarluutilinnut Sullissivik Nunamut Tamarmut Atuuttoq qullersatut akisussaaffigaa.
Immikkoortortaq suliassanik pingaarnernik makkuninnga pingaarnertut suliaqarpoq:

  • Perorsaariaatsinut tunngatillugu siunnersuineq, ineriartortitsineq ilitsersuinerlu
  • Perorsaanermut tunngatillugu nakkutilliineq
  • Meeqqanut inuusuttunullu ulloq unnuarlu paaqqinniffinnut kiisalu inunnut innarluutilinnut paaqqinniffinnut ilinniagaqartitsinerit pikkorissartitsinerillu
  • Qitiusumik Inissiinissamut Innersuussisarfik
  • Sanaartortitsinikkut aserfallatsaaliuinikkullu suliassat
  • Ulloq unnuarlu paaqqinniffinnik Namminersorlutik Oqartussanit pigineqartunik ataatsimut ingerlatsineq
  • Ulloq unnuarlu paaqqinniffinnik akuersissuteqartarneq

Qitiusumik Siunnersuisarfik

Qitiusumik Siunnersuisarfiup meeqqat inuusuttullu atugarliortut pillugit suliassaqarfimmik kommuninik siunnersuinissamik ilitsersuinissamillu pingaarnertut suliassaraa, matumani suliassaqarfimmi inatsisitigut inunnillu isumaginninnikkut ilisimasat patajaallisaaviginiarlugit.

Immikkoortortap ilaatigut Meeqqanik kinguaassiutitigut atornerlunneqarsimasunik katsorsaallutik angalaqatigiittartut aamma Inersimasunik meeraanerminni kinguaassiutitigut atornerlunneqarsimallutik kingunerlutitsisunik katsorsaallutik angalaqatigiittartut ingerlatarai.
Immikkoortortaq Isumaginninnermi suliassaqarfimmi periutsinik ineriartortitsinermik suliaqartarpoq, ilaatigullu aamma kommunini Ilaqutariinni aqqutissioqatigiinnerup ineriartortinnissaannut atortussanngortinneranillu akisussaasuulluni.

Tamatuma saniatigut isumaginninnermi suliassaqarfiup iluani oqarasuaatikkut siunnersuisarnerit innuttaasunut sammititat ingerlannissaat katersornissaallu akisussaaffigai.

Immikkoortortaq suliassanik pingaarnernik makkuninnga pingaarnertut suliaqarpoq:
Sulianut meeqqanut inuusuttunullu tunngasunut kommuninik siunnersuisarneq ilitsersuisarnerlu

  • Isumaginninnermi suliassaqarfimmut tunngasunik oqarasuaatikkut siunnersuisarnerit
  • Kommunini sulianik suliarinnittartut ilinniartinneqarnerat
  • Periutsinik ineriartortitsineq – matumani ilaqutariinnut paarsisartunut pikkorissaanerit aamma ilaqutariinni aqqutissioqatigiinneq ilanngullugit
    Pikkorissartitsisarnerit
  • Katsorsaanissamut neqeroorutinik ingerlatsineq, soorlu:
    Inersimasunik meeraanerminni kinguaassiutitigut atornerlunneqarsimallutik kingunerlutitsisunik katsorsaallutik angalaqatigiittartut
    Meeqqanik kinguaassiutitigut atornerlunneqarsimasunik katsorsaallutik angalaqatigiittartut

Suliniutinut Ineriartortitsinermullu immikkoortortaq

Suliniutinut Ineriartortitsinermullu Immikkoortortap Pitsaaliuinermut Isumaginninnermullu Aqutsisoqarfiup suliassaasa iluaniittunik suliniutinik nutaanik ineriartortitsineq piviusunngortitsinerlu suliassarai. Taakkulu kommunit sullitanik aalajangersimasunik sullissinerisa patajaallisarnissaat siunertaralugu suliniutinik ineriartortitsinertut iluseqartarput, aammali Pitsaaliuinermut Isumaginninnermullu Aqutsisoqarfiup iluani suliassanik naammassinnittarnermut patajaallisaatitut suliniutitut iluseqartarlutik.

Immikkoortortaq ilaatigut Naalakkersuisut kinguaassiutitigut atornerluineq akiorniarlugu periusissiaat Killiliisa aqqutigalugu ineriartortitsinermik atortussanngortitsinissamillu suliaqarpoq, tamatumalu saniatigut meeqqanik inuusuttunillu suliaqarnermi immikkoortut suliassaqarfiillu assigiinngitsut suleqatigiinnerisa nukittorsarnissaannut periutsinik ineriartortitsinermik suliaqarlutik.

 


Allattoqarfik

Allattoqarfiup tapiissutinik qinnuteqaatit suliarisarpai, isumaginninnermilu suliassaqarfimmut tunngasunik paasissutissanik kisitsisitigullu paasissutissanik katersinissamik akisussaasuulluni. Tamatuma saniatigut allattoqarfimmi inatsisileritooq atorfeqarpoq, taannalu Qitiusumik Siunnersuisarfik suleqatigalugu meeqqanut sulianut inatsisinillu attuumassutilinnut kommuninik ilitsersuillunilu siunnersuisarluni.

Tamatuma saniatigut Pitsaaliuinermut Isumaginninnermullu Aqutsisoqarfiup iluani allaffissornikkut suliassat naammassisarnissaannut ikiortaasarnissaq pingaarnertut suliassaraa.

 


Aningaasaqarnermut immikkoortortaq

Aningaasaqarnermut Immikkoortortap ulloq unnuarlu paaqqinniffiit Namminersorlutik Oqartussanit pigineqartut ingerlanneranni aningaasaqarnikkut suliassartai isumagisarai. Immikkoortortap ulloq unnuarlu paaqqinniffiit tamakkerlugit aningaasaqarnikkut ingerlaavartumik nakkutigisarivai. Immikkoortortaq Naalakkersuisoqarfiup aamma Pitsaaliuinermut Isumaginninnermullu Aqutsisoqarfiup aningaasaqarnerannik suliaqarpoq.

Tamatuma saniatigut innuttaasut Danmarkimi inissinneqarsimasut tikeraartarnissaasa piviusunngortinnissaannut immikkoortortaq suliaqarpoq.

MALUGIUK! Fakturanut akissarsianullu tunngatillugu saaffiginnissutit tamarmik f-oekonomi@nanoq.gl-mut nassuinneqartassapput.

 


Ineriartortitsinissamut Siunnersuisooqatigiit

Ineriartortitsinissamut Siunnersuisoqatigiit Pitsaaliuinermut Isumaginninnermullu Aqutsisoqarfimmut siunnersuisarfittut atuupput. Ineriartortitsinermut Siunnersuisoqatigiit aalajangiisinnaassuseqanngillat kisiannili kommunit Pitsaaliuinermut Isumaginninnermullu Aqutsisoqarfiup akornanni pitsaasumik oqaloqatigiinnissanut pitsaasumillu suleqatigiittoqarnissaanut tunngaviliinissaq siunertaralugu sulilluni.

Siunnersuisoqatigiit sulianut tunngatillugu oqalliffiuvoq, tassanilu Pitsaaliuinermut Isumaginninnermullu Aqutsisoqarfiup sulineranut isumassarsiortoqarsinnaalluni suliallu tungaasigut ilisimasanik aallerfiusinnaalluni, matumani Siunnersuisoqatigiit isumaginninnermi suliassaqarfimmi ineriartortitsisoqarnissaanut, allannguisoqarnissaanut pitsannguisoqarnissaanullu siunnersuuteqarsinnaalluni kissaateqarsinnaallunilu.

Ineriartortitsinermut Siunnersuisoqatigiit ukuninnga inuttaligaavoq:

• Aqutsisoqarfimmi pisortaq Pitsaaliuinermut Isumaginninnermullu Aqutsisoqarfimmeersoq (Siulittaasoq)
• Kommunini isumaginnittoqarfinni pisortat
• Aallartitat marluk Pitsaaliuinermut Isumaginninnermullu Aqutsisoqarfimmeersut
• Aallartitaq Isumaginninnermut Inatsisinillu Atuutsitsinermut Naalakkersuisoqarfimmeersoq
• Inuit marluk sulianik ilisimasallit
• Aallartitaq Ilisimatusarfimmeersoq isumaginninnermut tunngasunik suliaqartoq

Ineriartortitsinermut Siunnersuisoqatigiit ukiumut marloriarlutik ataatsimiittarput.